తెలంగాణరాజకీయాలు

ఆ కానిస్టేబుల్‌ అంత్యక్రియలపై రేవంత్ అసహనం!

కరోనాపై పోరులో ముందుండే డాక్టర్లు, నర్సులు, ఇతర ఆరోగ్య కార్యకర్తలు, పోలీసుల పట్ల కేసీఆర్ సర్కార్ తీరును కాంగ్రెస్ నేత మల్కాజ్‌గిరి ఎంపీ రేవంత్ రెడ్డి తప్పు పట్టారు. ఇటీవల వైరస్ సోకి చనిపోయిన పోలీసు కానిస్టేబుల్ దయాకర్‌ రెడ్డి మృతిపై కీలక వ్యాఖ్యలు చేశారు. కరోనా డ్యూటీ చేస్తూ మరణించిన దయాకర్‌ రెడ్డి అంత్యక్రియలను అధికార లాంఛనాలతో చేయకుండా ప్రభుత్వం అవమానించిందని రేవంత్ రెడ్డి మండిపడ్డారు. అహర్నిశలు కరోనాపై జరిపిన పోరులో విధులు నిర్వహించిన పోలీసు కానిస్టేబుల్‌ కు అనాథ శవంలా అంత్యక్రియలు చేశారని పేర్కొన్నారు. కనీసం అంత్యక్రియలను పోలీసు ఉన్నతాధికారులెవరూ పట్టించుకోలేదని ఆవేదన వ్యక్తం చేశారు. ఈ విషయంపై ఐసీఎంఆర్‌, ప్రధాని మోదీకి ఫిర్యాదు చేస్తానని పేర్కొన్నారు. కరోనా డ్యూటీ చేస్తూ మరణించిన దయాకర్‌ రెడ్డికి ప్రభుత్వం వెంటనే రూ.కోటి ఆర్థిక సాయం అందించాలన్నారు. కరోనాతో మరణించిన కానిస్టేబుల్ దయాకర్ రెడ్డి కుటుంబానికి కాంగ్రెస్ పార్టీ తరపున రూ.లక్ష ఆర్థిక సాయం అందివ్వనున్నట్టు వివరించారు